2 Chronicles 35
1 約西亞王在耶路撒冷守𨃟過節敬拜上主。正月十四佢等為這節期㓾頭牲。
2 王分派祭司在上主个聖殿中執行任務，鼓勵佢等在職務上忠心。
3 佢也指示利未人，就係該兜獻身給上主个以色列教師，講：「你等愛將聖約櫃放在以色列王大衛个孻仔所羅門所起个聖殿肚，毋使扛來扛去。這下你等愛服事上主—你等个上帝㧯佢个子民以色列。
4 你等愛照以色列王大衛㧯佢个孻仔所羅門所寫、分派給你等个職務，照宗族个順序在聖殿值班；
5 你等自家愛分配好勢，使你等當中有兜人做得幫助以色列逐個家庭。
6 你等愛㓾𨃟過節个細羊仔㧯山羊，潔淨自家，為你等个以色列同胞準備獻祭，好遵守上主通過摩西所吩咐个話。」
7 約西亞為到人民在𨃟過節个需要，對自家个牛群、羊群中捐出三萬隻細綿羊牯、細山羊牯，㧯三千隻牛牯。
8 佢个官員也自願為人民、祭司㧯利未人奉獻。主管上帝聖殿个官長—大祭司希勒家、撒迦利亞、㧯耶歇給該兜祭司兩千六百隻細綿羊牯、細山羊牯，㧯三百隻牛牯做𨃟過節个牲儀。
9 利未人个領袖—歌楠雅㧯厥兩兄弟示瑪雅、拿坦業，並哈沙比雅、耶利、㧯約撒拔捐出五千隻細綿羊牯、細山羊牯，㧯五百隻牛牯給利未人做𨃟過節个牲儀。
10 𨃟過節个事安排好勢以後，祭司㧯利未人聽王个命令照輪班各人做各人个事。
11 利未人將㓾好个細羊仔剝皮，祭司將血洒在祭壇頂，
12 然後佢等照家族將燒化祭个頭牲分給人民，使佢等做得照摩西法律个指示來獻給上主。
13 利未人照規定用火焙𨃟過節个牲儀，又用鑊頭、烳鍋煮祭物，遽遽將肉分給人民。
14 然後利未人為自家㧯亞倫後代个祭司準備，因為祭司燒牲儀㧯牲儀个油，無閒到暗。
15 利未人亞薩宗族个歌手—亞薩、希幔、㧯王个先見耶杜頓，照大衛王个指示各人企在各位。看守聖殿个警衛毋使離開佢等个工作，因為其他利未人已經為佢等準備好𨃟過節个祭物。
16 恁樣，守𨃟過節㧯在祭壇頂獻燒化祭敬拜上主个事，全部照約西亞王个吩咐在該日準備好了。
17 連等七日，所有在場个以色列人全部守𨃟過節㧯除酵節。
18 對先知撒母耳時代以來，在以色列中吂識恁盛大守𨃟過節。以前个以色列王也無一個像這擺恁樣，連約西亞王、祭司、利未人、猶大、以色列、㧯耶路撒冷人民全部共下守𨃟過節。
19 這擺𨃟過節係在約西亞做王个第十八年守个。
20 約西亞王為聖殿做好這所有个事以後，埃及王尼哥帶領軍隊攻打幼發拉底河个迦基米施。約西亞想愛阻擋佢，
21 總係尼哥傳話給約西亞講：「猶大王啊，𠊎打這場戰爭㧯你無關係；𠊎毋係來攻打你，係攻打𠊎个仇敵。上帝愛𠊎遽遽去做。你毋好干涉上帝个事，免得佢毀滅你，因為上帝㧯𠊎共下。」
22 總係尼哥所講上帝个話，約西亞毋聽，毋肯轉身離開佢，決定愛㧯佢戰爭。約西亞就改裝，到米吉多平原去相㓾。
23 約西亞王在戰場被埃及人个箭射到；王命令僕人講：「𠊎受重傷了！將𠊎帶走！」
24 佢等將佢扶出戰車外，放在第二輛戰車，帶到耶路撒冷。佢死在該位，葬在王室个墳墓肚。所有猶大㧯耶路撒冷个人民全部為佢哀傷。
25 先知耶利米為約西亞王做哀歌。所有唱歌个男女全部唱這首歌來哀悼佢；這在以色列中成做一種風俗，直到今晡日。這首歌記在《哀歌書》底背。
26 約西亞其他个事，包含佢對上主忠誠，對法律个順服，
27 㧯佢一生人所做个事，全部記在《以色列㧯猶大列王史》底背。